KAMATI YA WATAALAMU WA MAAFA YAZINDULIWA KATIKA HALMASHAURI YA WILAYA YA BAHI (KAMATI TENDAJI YA MAAFA WILAYA).

03 November 2023

Kamati ya Wataalam ya Wilaya ya Usimamizi wa Maafa ina jukumu la kuishauri Kamati Elekezi ya Wilaya ya Usimamizi wa Maafa kuhusu hali ya maafa Wilayani na kuhakikisha inaandaa mipango ya maendeleo inayozingatia hatari za maafa.

Kamati ya Wataalam ya Wilaya ya Usimamizi wa Maafa ina wajumbe wafuatao;

• Mkurugenzi Mtendaji wa Halmashauri ambaye ndiye Mwenyekiti;
• Wakuu wa Idara na Vitengo vyote katika Halmashauri;
• Afisa Operesheni Wilaya wa Jeshi la Zimamoto na Uokoaji;
• Mkuu wa Upelelezi Wilaya wa Jeshi la Polisi Tanzania;
• Mkuu wa taasisi inayohusika na barabara za mijini na vijijini Wilayani;
• Wakuu wa taasisi zinazohusika na huduma za maji na usafi wa mazingira Wilayani;
• Mratibu wa Wilaya wa Chama cha Msalaba Mwekundu Tanzania;
• Kamishna wa Skauti Wilayani.

Mkuu wa Idara ya Mipango wa Halmashauri ndiye Katibu wa Kamati. Kamati ya Wataalam ya Wilaya ya Usimamizi wa Maafa inaweza kumualika mtu yeyote kwenye kikao chake kama itakavyoona inafaa, kutegemea na tishio au madhara ya tukio la maafa. (mfano; TANESCO n.k)

Majukumu ya Kamati ya Wataalam ya Wilaya ya Usimamizi wa Maafa.

Kamati ya Wataalam ya Wilaya ya Usimamizi wa Maafa ina jukumu la; -

• Kuratibu, kusimamia na kufuatilia utekelezaji wa shughuli za usimamizi wa maafa na huduma za dharura kama itakavyoelekezwa na Kamati Elekezi ya Wilaya ya Usimamizi wa Maafa;
• Kusaidia, kuhamasisha upatikanaji na kutenga rasilimali kwa ajili ya usimamizi wa maafa na huduma za dharura Wilayani;
• Kuwezesha na kufuatilia ujumuishaji wa masuala ya kupunguza madhara ya majanga katika mpango wa maendeleo, miradi, programu na bajeti;
• Kusaidia na kushiriki kufanya tathmini ya hatari za majanga, madhara ya uharibifu na mahitaji ya kibinadamu na kurejesha hali baada ya maafa katika eneo husika;
• Kuandaa na kutekeleza mkakati wa kupunguza madhara ya maafa na mpango wa kujiandaa na kukabiliana na dharura, kuendesha mafunzo, mazoezi ya nadharia na mfumo wa kurejesha hali katika eneo husika;
• Kutoa mwelekeo wa makisio ya rasilimali zitakazohitajika kwa mwaka wa fedha katika Mfuko wa Taifa wa Usimamizi wa Maafa;
• Kuandaa mfumo wa teknolojia na mawasiliano ya habari kwa ajili ya tahadhari ya mapema, operesheni na takwimu kwa ajili ya usimamizi wa maafa Wilayani;
• Kutunza kumbukumbu za taarifa na takwimu za awali za matukio ya maafa na hatua za tahadhari katika Wilaya;
• Kutafsiri taarifa za tahadhari ya mapema dhidi ya majanga na kupendekeza hatua za kuchukua katika Wilaya; na
• Kuainisha, kufanya tathmini na kuandaa profaili ya majanga katika Wilaya.

Kamati ya Wataalam ya Wilaya ya Usimamizi wa Maafa inaweza kuanzisha kamati ndogo kwa ajili ya kuhakikisha utekelezaji bora wa shughuli za usimamizi na uratibu wa maafa katika Wilaya.